Physical Address
304 North Cardinal St.
Dorchester Center, MA 02124
書店店員
我同突破書廊結緣，其實係上年參加突破嘅 DSE 實習計劃。今年上咗大學，考完 Final 放暑假冇咩做，上年帶我嘅導師就問我想唔想返嚟幫手。於是，呢度就成為咗我人生第一份兼職，亦係一份我真心好喜歡嘅工作。
剛開始返工嗰陣，老實講真係好驚青，咩都唔熟。好怕收銀入錯數、聽到電話響又唔敢接、客人問嘢我又好多都答唔出……嗰種挫敗感其實都幾大。
好彩店長同埋一班同事都超級熱心！佢哋好有耐性咁慢慢教我，甚至願意特登企喺我身邊睇住我做，就算我有失誤都只係輕輕提醒，完全冇畀壓力我。結果做咗差唔多一個月，我已經基本上掌握晒書廊嘅日常運作：補貨、收貨、點算新貨、記清楚啲貨擺喺邊個儲存櫃，仲有收銀、查書搵書，同埋將新到嘅書入 System，全部都難我唔倒！
喺上年我有份參與嘅「二手書車」，今年竟然有超多人響應同留意！好多書友特登打電話嚟，或者親自搬幾箱書過嚟捐，反應熱烈到連儲存櫃都唔夠位放。每個月起碼賣得出成千本二手書！
其實我自己都有受惠，執到唔少寶！例如東野圭吾嘅《白夜行》同埋村上春樹嘅《挪威的森林》。對我哋呢啲學生嚟講，可以用最抵嘅價格買到好書，唔使浪費錢買新書之餘，仲好環保添～
呢架二手書車，正好呈現咗我一直以嚟嘅理念：
閱讀從來都唔係一個人嘅事，
而係一班人嘅事。
書展初體驗（15——21/7）
身為一個極鍾意睇書嘅人，點少得去書展做嘢呀？今個暑假我終於有機會親身參與呢個盛事啦！超好奇書展啲參展工作人員到底會做啲咩呢？
第一日開工，我本來好期待。拎到張「參展商通行證」嗰一刻真係覺得自己幾型，可以免費入場，快速穿梭各個攤位，完全唔使跟人排隊，仲可以順便周圍睇下有冇啱心水嘅書。點知現實好快打臉我，呢份工遠比我想像中辛苦好多！
最辛苦嘅肯定係要成日巡邏鋪頭。我幾乎要站足全程，一邊不停補貨，一邊仲要周圍留意有冇人偷嘢。有時人流真係太多，收銀區排晒長龍，一個人根本搞唔掂。好彩我平時喺突破書廊有做書店經驗，所以即刻主動上去幫手，手腳都算快！另外，我最唔習慣但又必須要做嘅，就係要不停loop叫賣：「我哋做緊 9 折優惠啊！買滿 3 件仲有 8 折！」（查實我嗰陣時一啲都唔大聲，想慳力水）要走遍展場每個角落，我估自己起碼講咗有幾百次……
中間嗰 1 小時放飯時間，其實完全唔夠用。由展區行出去灣仔搵嘢食，來回已經冇咗 20 分鐘。扣埋食飯時間，根本連坐低唞吓，碌下手機嘅時間都冇。好彩我當初係報晚更（一星期返 5 日，每日 7 個鐘），如果係開全日早晚通班，我諗我真係會直接崩潰……
不過，我見到勁多朋友特登抽時間過嚟捧場！有啲係啱啱 DSE 放榜就跑過來搵我，有啲仲帶埋一班friend，特登等我放工嚟探班打氣。見到大家嘅那一刻真係超開心，即刻滿血復活！工作期間，間中仲會有突破嘅同工買埋蛋撻呢啲糕點嚟為我哋應援，大家一齊邊食邊吹水，原本枯燥嘅巡邏時間變得溫馨起嚟。
你問我出年仲會唔會再去？如果可以一直坐喺張凳度做收銀嘅話，或者可以考慮下（笑）；但如果又要我站足全場巡邏，咁就真係大機會唔會啦～
雖然過程好攰好chur，但呢次我覺得絕對係我暑假最特別嘅體驗之一。除咗親身體會到盛事背後嘅辛酸，更重要係收獲咗滿滿嘅朋友愛同溫暖，係值得嘅！
Summer Camp （23——25/7）
難得咁人齊 好姊妹仲有兄弟
——農夫《難得咁人齊》（Summer Camp 主題曲）
今晚一於等睇逐個歸位 若果到齊
嚟 一起俾啲聲勢……
我去咗西貢戶外康樂中心參加 3 日 2 夜嘅 Summer Camp。呢幾日只能夠講——勁！X！熱！
我真係好耐冇參加過營會活動啦！今次除咗去唱 K，仲第一次學玩桌球，點知一玩就入坑，好玩到上癮！不過最刺激嘅係我哋搭船去沙灘玩水上活動嗰日。其實我本身一啲都唔想落水，但見到現場氣氛咁熱烈、所有人都跳晒落水，我最後都係迫於無奈跟住一齊落去爆玩！結果我一個唔小心飲咗好多啖鹹到嘔嘅海水，腳仲要被底下的礁石刮損咗……有位叫阿 Sam 嘅朋友仲慘過我，佢被礁石刮傷之後，之後幾日行路都要拐吓拐吓，要其他人扶住行（笑）。
呢幾日入面，我留意到活動嗰個搞手背後其實好辛苦……
今次嘅主 Host 係 5Yan，聽講係佢第一次做 Summer Camp 總籌。睇住佢一邊要不停同各個部門聯繫協調，另一邊仲要照顧啲仲係中學生嘅參與朋友，真心佩服佢可以咁 Chur 得！不過，我真係唔忍心睇住佢哋忙到咁辛苦，所以都有主動幫手搬物資同埋照顧組員，希望可以盡量減輕佢哋嘅負擔，有幾多得幾多。
呢個係我第一次參加「石仔 Summer Camp」，看見一班青年人齊心協力去帶領另一班青年人玩，心裏有種莫名嘅感動。雖然天氣熱到差啲融，身體攰到癱，但一齊笑過、攰過、互相扶持每個moment，已經係我哋呢個暑假裡最滾熱、最耀眼嘅記憶~
聯校音樂會（23/8）
我做咗件人生大突破——去咗聯校音樂會，同朋友夾 Band 上台表演！
老實講，初頭我係好唔願意上台，始終完全冇個膽量。點知最後喺 5Yan 嘅「鼓吹」同慫恿之下，我唯有頂硬上。既然要唱，我就揀咗 RubberBand 嘅《發現號》，一嚟首歌又爆又啱夾 Band，二嚟可以帶動全場氣氛，再合適不過。
點知揀完之後，我好快就後悔，爭啲上換支歌仔唱……因為呢首歌需要嘅 Energy 實在太大！每次練完兩次之後，我幾乎已經全身無力（我就係咁弱雞冇計），完全冇辦法繼續唱落去……
雖然呢次係我第一次公開上大舞台唱歌，但出奇地我居然一點都唔緊張。因為我哋平時逢星期五同星期日喺「泰力」有訓練台上 Jam 歌。我對自己都幾有自信，敢講自己喺泰力都算係唱歌最叻嗰個，唯獨最弊就係我好容易唔記得歌詞，仲要甩 Beat……所以為咗「戴定頭盔」，防止現場炒晒車，我哋索性將 Band 隊直接改名叫「甩 Beat」。
Jay（鋼琴）、Sam（木結他）、我（主唱）、5 Yan（鼓）
其實音樂會前嗰兩個星期我真係超努力咁背歌詞㗎！返工嗰陣手機 Spotify 基本上係不斷 loop 緊《發現號》，夜晚返到屋企仲要好似考試咁默寫歌詞。想同你講下《發現號》佢難嘅位係每個 Chorus 嘅最後兩句都有啲輕微分別：
- Chorus 1：「若生於某個 總擠不進我地點 註定遠征一遍」
- Chorus 2：「逆光中進發 不甘安置到盲點 上路去再實踐」
- Chorus 3： 第三句仲要變咗「劃破了風衣 丟了救生衣 成全這最美歷險」
單單係背呢三個 Chorus 已經搞到我頭都大埋……
好彩，到了正式 Big Day 嗰日，一切都超級順利！雖然有少少甩 Beat，但完全唔算嚴重，出面聽落亦唔係幾覺，全場氣氛直接熱血沸騰！順利完成表演嗰一刻，真係特別有成就感，覺得自己好有型（BTW 嗰日我係穿住西裝唱嘅！）。
特別要多謝石仔嘅所有義工同統籌，搵場地同做前期準備綵排真係好辛苦。呢次經驗真係好dope，好fun，好熱血！
建立個人網站
建立一個屬於自己嘅個人網站，可能係我呢個暑假做過最大嘅決定。
其實想砌網站嘅諗法，早喺考完 DSE 嗰陣就已經萌生，當時純粹係希望可以將過去睇書學到嘅嘢運用到生活入面。點知後來日忙夜忙，過咗好耐自己都幾乎忘記咗呢件事。直到有日，我無聊翻開之前紀錄嘅隨身簿，無意中看到這條bucket list，先重新喚醒咗我要做想做嘅事。於是，我決定專注去做，睇著 YouTube 教學影片，由零開始一手一腳學砌自己嘅網站——呢個，算係我真正想認真經營自己嘅開始。
（順帶一提，網站第一篇關於 IG 同 Threads 嘅文章，其實係透過模仿其他內容創作者，想學佢哋嘅寫作思路同技巧；到咗第二篇講「鬆弛感」，先係我真正開始構思自己最想寫嘅內容。）
這段創作過程入面，我發現原來寫作真係會越寫越上癮！
那種感覺好似心入面累積咗好耐嘅心事與想法，終於找到個出口一次過爆曬出嚟，去分享自己最真實嘅一面。擁有個人網站就好似有自己嘅畫布咁，想點寫就點寫，想點玩就點玩，無人會話你（因為唔係嗰個都會睇）。比起喺 Threads 上要拘謹自己嘅言論、擔心討唔討好人，喺自己嘅網站寫作自在得多好多。
直到而家我都係度搵緊自己寫作方向，主要係希望可以透過文字陪到身邊嘅朋友一齊成長，分享下啲得意有趣嘅故仔。寫嘅嘢如果自己開心嘅同時都可以幫到人，感覺都幾好呀。
曼谷旅行（28/6—— 2/7）
今個暑假第一個去嘅國外旅遊，就係同屋企人去咗曼谷玩。最初我哋有考慮過去日本，但諗到暑假日本天氣又熱又曬，唔太適合長期留在戶外。相比之下泰國就舒服得多，雖然溫度高，但勝在天氣乾爽，完全唔似香港嗰種令人窒息嘅濕熱。三十幾度著住清涼嘅短袖衫褲，就可以好輕鬆咁玩足全日架啦～
我好鍾意泰國人個種極度 Chill 嘅生活節奏。曼谷唔係到到都係旅遊區或者高樓大廈，反而保留咗超多傳統文化建築。今次我同屋企人去咗「臥佛寺」，佢係曼谷最古老亦係最大的皇家寺廟之一。我喺現場真的能親身體會到泰國人「慢工出細活」嘅精細工藝，整個建築群華麗得嚟又保持著莊嚴。臥佛寺規模非常大，好適合靜靜哋隨心漫步，又或者隨便找個地方坐低，歎住杯凍啡欣賞周圍嘅景色。見到這種充滿文化特色嘅地方，我就會不停用手機影相捕捉唔同角度細節，想記錄最地道嘅人文氣息。
除了逛寺廟，我哋仲搭咗 Tuktuk（嘟嘟車）去唐人街——呢度係電影《給阿嬤的情書》（How to Make Millions Before Grandma Dies）嘅取景地！（這部戲我真的由頭喊到尾，超強烈推薦去看！）講真，行入去唐人街真係超有以前老香港嘅味道！街道兩邊掛滿晒大大小小嘅霓虹燈招牌，上面印著紅底黃字嘅大大隻中文字，象徵著富貴吉祥。如果你都好喜歡這部電影，非常建議過嚟拍照打卡感受下氣氛；不過小提醒，飲食消費就相對偏貴少少，留個影就可以啦。、
1️⃣ Miffy Café Bangkok
Miffy主題店！好多位可以打卡影靚相，主要係食西式Miffy造型甜品，又靚又好食～食完嘢之後仲可以去佢哋精品店買嘢。整體CP值唔錯～
2️⃣ Nueng Nom Nua 創意吐司店
（Banthat Thong分店）
聽講是曼谷最有人氣的甜品店。街上見到有好多遊客對住餐廳巨型公仔招牌打卡。我就冇完全入餐廳試，因為要排好耐隊，同埋已經食飽嘢，只係去做鋪頭買咗啲唔同好味樽裝牛奶（好好飲）。佢出名去佢個吐司係用咗日本麵包粉自製，搭配埋泰式沾醬一齊食。
我覺得應該唔差，值得推介下。好食話俾我知～
3️⃣ Wattana Panich 郭炎松餐廳
佢哋依間係老字號正宗潮州小吃，裝潢睇落好殘舊，但係佢哋啲老滷藥膳牛肉湯料理真係好正！你會見到有開放式大爐灶煲煮滷汁，提上去吸收幾十年嘅精華（至於有冇吸收埋路邊啲飛塵我就唔啦）。佢俾嘅粉唔多，但料係多。好暖胃，而且佢有中藥成分，感覺好養生。大推！不過需要留意交通方唔方便，始終佢唔算係啲熱鬧市區個頭。
4️⃣ After You Dessert Cafe（Silom Complex）
依間cafe 開係市中心大型商場入面。裝修好溫馨有格調，好似進入一個小木屋咁。佢主要食雪綿冰，可以揀大細size，一個人食或者同friend share 都可以。建議試吓佢個泰式奶茶雪綿冰，陪埋蜜糖多士一定超正！食完甜品仲可以行商場，過度啲商場好似將軍澳咁，一個駁住另外一個商場，唔使行出街就可以去第二個shopping。要預早少少，因為有排你行～
- transgender 係好平常嘅事，每日至少會遇到一個
- 有朝到晚都塞車，半個鐘車程起碼會變一個鐘
- 啲樽裝水 平到好似唔使錢咁
- 泰國食物物價比香港平好多，求其一杯手沖野飲差唔多$20蚊港紙
- 多數的士司機唔會跳錶收費，佢哋會同你講價，最好講到差唔多200泰銖就stop
- 名牌款式比香港多二三成，要做好功課再去掃貨
- 廁紙好簿…
